Шартнома томонлардан бирининг фикрига кўра, учинчи давлатлар томонидан қуролли ҳужум таҳдидини келтириб чиқарадиган вазият юзага келган тақдирда, уни тинч йўл билан ҳал қилишга ёрдам берадиган чора-тадбирларни кўриш мақсадида ўзлари аъзо бўлган халқаро ташкилотлар доирасида томонлар зудлик билан икки томонлама асосда ҳам, келишув доирасида ҳам бир-бири билан тегишли маслаҳатлашувларни ўтказадилар..
Бундан ташқари, томонлар ҳеч қандай блоклар ёки иттифоқларда қатнашмаслик, шунингдек, бошқа томонга қарши қаратилган ҳар қандай ҳаракатларда қатнашмаслик мажбуриятини оладилар.
"Томонлардан бирортаси ўз ҳудуди ва ресурсларидан бошқа томонга қарши тажовуз ёки бошқа душманона ҳаракатларни тайёрлаш ёки амалга ошириш мақсадида, шунингдек, иккинчи томоннинг давлат суверенитети, хавфсизлиги ва ҳудудий яхлитлигига зарар етказиш мақсадида фойдаланишга йўл қўймайди. Томонлар ўз ҳудудларида алоқа тизими ва бошқа инфратузилма объектларидан учинчи давлатлар томонидан бошқа томонга қарши қуролли ҳаракатлар ёки бошқа душманлик ҳаракатларини тайёрлаш ёки ўтказиш мақсадида фойдаланишига йўл қўймаслик мажбуриятини оладилар", — дейилади ҳужжатда.
Шу билан бирга, давлатлар минтақавий низоларни халқаро ҳуқуқнинг умумэътироф этилган нормалари, биринчи навбатда, давлатлар суверенитети, ҳудудий яхлитлиги ва чегаралар дахлсизлигини ҳурмат қилиш ва таъминлаш асосида тинч йўл билан/музокаралар йўли билан ҳал этишга кўмаклашишга ҳаракат қилмоқда.
Дипломатлар келишув Қозоғистон-Ўзбекистон стратегик шериклигини янада мустаҳкамлашга катта ҳисса қўшишига ишонч билдирмоқда.
"Шартнома Қозоғистон ва Ўзбекистон ўртасидаги ўзаро манфаатли ҳамкорликни янада чуқурлаштириш ва икки томонлама ҳамкорликни сиёсий, иқтисодий, инвестицион, илмий-техникавий ва маданий-гуманитар соҳаларда ҳар томонлама ривожлантириш учун мустаҳкам асос бўлиб хизмат қилади", — дейилади ҳужжатда.