Ислом тараққиёт банки Қозоғистоннинг сув секторига 1,15 млрд доллар сармоя киритади. Томонлар тегишли келишувни Бокуда бўлиб ўтган БМТнинг иқлим ўзгариши бўйича конференциясида (CОР29) имзоладилар. ҚР Бош вазири ўринбосари – ҚР Миллий иқтисодиёт вазири Нурлан Байбазаров бу тарихдаги Ислом тараққиёт банки томонидан молиялаштирилган энг йирик лойиҳа эканлигини таъкидлади.
Бундан ташқари, Ислом тараққиёт банки (ИТБ) Қозоғистоннинг сув хўжалигини ривожлантириш учун 3,5 миллион доллар миқдорида қайтарилмайдиган грант ажратди.
Шунингдек, ИТБ Сув хўжалиги ва ирригация вазирлиги томонидан ишлаб чиқилган “Иқлим ўзгаришига чидамли сув ресурсларини ривожлантириш” лойиҳасини амалга оширишда иштирок этмоқда. Бунгача томонлар Лойиҳанинг биринчи босқичи бўйича музокаралар баённомасини имзолаган эди.
Молиялаштирилган лойиҳанинг биринчи босқичи 4 та янги сув омборини қуриш ва мавжуд 4 та сув омборини реконструкция қилиш, 115 та канални реконструкция қилиш ва капитал таъмирлаш, жумладан, Астана сув омборини тўлдириш лойиҳасини ўз ичига олади. Қурилиш ишлари Ақмола, Алмати, Жамбил, Қизилўрда, Туркистон, Ғарбий Қозоғистон, Жетису вилоятлари ва Астана шаҳрида олиб борилмоқда.
Бундан ташқари, лойиҳа ИТБ ва вазирлик ўртасида Қозоғистон сув хўжалиги илмий-тадқиқот институтининг сув ва дарё ҳавзалари муаммоларини ўрганиш, шунингдек, сув ресурслари ахборот-таҳлил маркази учун эрта жавоб тизимларини жорий этиш бўйича техник ҳамкорликни назарда тутади.
Улар орасида “Қазсушар” республика давлат корхонасини техник жиҳозлаш ва сув ресурсларини бошқариш тизимини такомиллаштириш бўйича автоматлаштириш марказини қуриш режалаштирилган.
“Давлат раҳбари сув хўжалигига сармоя киритиш муҳимлигини бир неча бор таъкидлади. Бизнинг олдимизда сув инфратузилмасини модернизация қилиш ва уни давом этаётган иқлим ўзгаришларига мослаштириш вазифаси турибди. Ислом тараққиёт банки каби нуфузли институт томонидан молиялаштирилаётгани мамлакатимизга юксак ишонч, амалга оширилаётган инвестиция сиёсати ва ижтимоий-иқтисодий ислоҳотлардан далолат беради», – деди Нурлан Байбазаров.
