Хитойнинг Гуансий университети олимлари рак ҳужайраларини чўчқа ҳужайраларига “маскировка” қилиш усулини ишлаб чиқишди, деб хабар бермоқда inbusiness.kz. Бу усул иммун тизими томонидан рак ҳужайраларини самаралироқ йўқ қилиш имконини беради.

Усул ўсма тўқимасига махсус модификация қилинган вирусни жорий этишга асосланган бўлиб, у организмни рак ҳужайраларини чўчқаники деб қабул қилишга мажбур қилади. Бу таъсир α1,3GT гени орқали юзага келади, у орган кўчириб ўтказишда кузатиладиган рад этиш реакциясига ўхшаш реакцияни қўзғатувчи оқсил ишлаб чиқарилишини бошлайди. Бунга жавобан иммун тизими бундай ҳужайраларни бегона сифатида дарҳол таниб олади ва уларни фаол равишда йўқ қилишни бошлайди.

Клиник синовларда анъанавий даволаш усулларига иложи йўқ оғир шаклдаги рак касаллигига чалинган 23 нафар бемор қатнашди. Модификацияланган вирус ёрдамида иштирокчиларнинг 90%ида ўсмалар ўсиши тўхтатилди. Олимлар шуни ҳам қайд этишдики, ушбу усул бачадон бўйни раги билан оғриган бир беморда тўлиқ ремиссияга эришишга ёрдам берди. Вирус инъекциялари томир орқали юритилди ва бутун организмга таъсир кўрсатди, соғлом тўқималарга зарар етказмасдан ва жиддий ножўя таъсирлар келтириб чиқармасдан амалга оширилди.

Тадқиқотчиларнинг сўзларига кўра, ушбу усулнинг юқори самарадорлиги ўсмани озиқлантирувчи қон томирларининг йўқ қилиниши, рак ҳужайраларининг оммавий ҳалокати ва организмнинг кучли иммун жавоби билан изоҳланади. Ҳозирги пайтда технологияни янада ўрганиш мақсадида клиник синовларнинг иккинчи босқичини ўтказиш режалаштирилмоқда.

Абу Муслим