Ингушетия парламенти Россия Федерацияси Давлат думасига ўқувчиларнинг таълим муассасаларида ўз миллий анъаналари ва динига мос келадиган кийим кийиш ҳуқуқини таъминловчи қонун лойиҳасини киритишни режалаштирмоқда, деб ёзади "Коммерсант".
"Парламентнинг навбатдаги йиғилишида "Россия Федерациясида таълим тўғрисида"ги Федерал қонуннинг 38-моддасига ўзгартиришлар киритиш тўғрисида"ги федерал қонун лойиҳаси кўриб чиқилди", — дейилади Ингушетия парламенти хабарида.
Республика депутатларининг ишончи комилки, таълим муассасаларида ягона кийим формасини ишлаб чиқишда давлат органлари ўқувчиларнинг халқ анъаналари ва диний эътиқодларини ҳисобга олган ҳолда кийим кийишга бўлган конституциявий ҳуқуқини эътиборга олишлари ва бу масалани таълим муассасаларининг ихтиёрига қолдирмасликлари шарт.
Қонун лойиҳаси муаллифи, Ингушетия парламенти вице-спикери Аза Хашиеванинг сўзларига кўра, у муслима аёлларнинг таълим жараёнида рўмол ўраш тақиқлангани ҳақидаги кўплаб шикоятлари муносабати билан ишлаб чиқилган.
"Республикамизда, албатта, бундай муаммолар йўқ ва бўлиши ҳам мумкин эмас. Бироқ Россиянинг бошқа вилоятларида яшовчи ватандошларимиз шикоят қилишди", - дея тушунтирди Хашиева.
У дин ва халқ анъаналари талабларига мувофиқ кийиниш ҳуқуқи фуқароларнинг Россия Конституцияси билан кафолатланган эътиқод эркинлиги ҳуқуқининг бир қисми эканлигига ишонч ҳосил қилади ва у қаерда яшашидан қатъи назар, ҳурмат қилиниши керак.
Депутат Россияда мактаб ва олий ўқув юртларида рўмол ўрашни тақиқловчи қонун йўқлигини, бироқ таълим тўғрисидаги федерал қонунда таълим муассасалари раҳбарларига ўқувчилар учун кийиниш тартибини ўз хоҳишига кўра белгилашга рухсат берувчи банд борлигини таъкидлади.
"Бу ҳуқуқ баъзи ҳудудларда суиистеъмол қилиниб, муслима аёлларнинг дарсларга бошларини ёпиб келишлари тақиқланади", - дея шикоят қилди вице-спикер.