АҚШ Мудофаа вазирлиги (Пентагон) блокададаги Ғазо секторида ўт очишни тўхтатиш ғоясини қўллаб-қувватламайди, чунки бу Фаластиннинг ХАМАС ҳаракатининг "қайта гуруҳланишига" олиб келади. Бу ҳақда Пентагон матбуот котиби генерал Патрик Райдер баёнот берди.
"Биз Хамасга қайта тўпланиш учун вақт берадиган ва Исроил халқи ва бошқаларни хавф остига қўядиган ўт очишни тўхтатишни қўллаб-қувватламаймиз", деди у.
Шу билан бирга, Райдер АҚШ президенти Жо Байден Ғазо секторига зарур ёрдам етказилиши ва одамларни, жумладан, гаровга олинганларни олиб чиқиш учун гуманитар пауза ғоясини қўллаб-қувватлашини таъкидлади.
Пентагон раҳбари Ллойд Остин ҳамкасблари билан учрашувларида Ғазодаги фаластинлик тинч аҳолига гуманитар ёрдам етказиб бериш масаласини ҳам муҳокама қилди, деди матбуот котиби.
Исроил-Фаластин можароси
7 октабр куни эрталаб Хамаснинг ҳарбий қаноти Иззаддин ал-Қассам бригадалари Исроилга қарши Ал-Ақсо тўфони операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.
ҲАМАСнинг айтишича, операция босиб олинган Шарқий Қуддусдаги Ал-Ақсо масжидига бостириб кириши ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган.
Бунга жавобан Исроил армияси Ғазо секторида ўнлаб қирувчи самолётлар ёрдамида ХАМАСга қарши “Темир қиличлар” операцияси бошланганини эълон қилди, бу эса Ғазо аҳолисининг қирғинига айланиб кетди.
Ғазонинг 2,3 миллион аҳолиси Исроилнинг ҳаво, қуруқлик ва денгиздаги оммавий бомбардимонлари ҳамда эксклавнинг тўлиқ блокадаси туфайли озиқ-овқат, сув ва дори-дармон танқислигидан азият чекмоқда.
Исроил-Фаластин можароси авж олгандан бери 9 мингдан ортиқ фаластинлик ҳалок бўлди. Расмий маълумотларга кўра, ҳалок бўлган фаластинликларнинг қарийб 70 фоизи аёллар ва болалардир. Исроилда қурбонлар сони 1500 дан ошади.
БМТ Бош Ассамблеяси зудлик билан гуманитар оташкесимга чақирди. Шу билан бирга, Иордания таклиф қилган резолюция учун 120 давлат овоз берди. Бироқ Исроил бу таклифни рад этди.
