АҚШ делегацияси БМТ Хавфсизлик Кенгашида Ғазода "дарҳол, шартсиз ва доимий ўт очишни тўхтатиш" чақирувини ўз ичига олган резолюцияга вето қўйди.
Овоз бериш натижалари
14 давлат резолюцияни қўллаб-қувватлади, овоздан тийилганлар йўқ. Ҳужжат халқаро тинчлик ва хавфсизликни таъминлаш учун Кенгашнинг масъулиятини эслатиб, барча тарафлар ўртасида ўт очишни дарҳол, шартсиз ва доимий равишда тўхтатишни талаб қилар эди. Шунингдек, барча гаровдагиларни "дарҳол ва шартсиз" озод қилиш талаби ҳам бор эди.
АҚШнинг позицияси
АҚШнинг БМТдаги доимий вакили ўринбосари Роберт А. Вуд вето қўйиш сабабини тушунтириб, дипломатлар ҳужжатни келишишда бундай оқибатдан қочиш учун бир неча ҳафта ишлаганини билдирди.
- "Биз ҳар қандай шартсиз ўт очишни тўхтатишга рози бўлмаймиз, агар бу гаровдагилар озод қилинишига олиб келмаса", деди у.
- Унга кўра, резолюция ХАМАСга музокара столига қайтишга ҳожат йўқлигини англатадиган хатарли сигнал бўлиши мумкин эди.
Вуд Ғазодаги урушни тугатиш ва гаровдагиларни озод қилиш вақти келганини таъкидлади, шунингдек, АҚШ Исроилга анклавга ёрдам етказиб беришни кўпайтириш зарурлигини аниқ билдирганини қўшимча қилди.
Россиянинг танқиди
Россиянинг БМТдаги доимий вакили Василий Небензя АҚШнинг вето қўйишини "ҳайратланарли" деб атади ва бу ҳаракатни "фаластинликлар ва исроилликларнинг ҳаётини сақлаб қолиш бўйича жамоавий ҳаракатга тўсқинлик" деб баҳолади.
- Небензянинг таъкидлашича, АҚШ тинчлик йўлидаги уринишларга қаршилик қилиб, фаластинликларнинг ҳаёти эвазига ўз сиёсий манфаатларини илгари сурмоқда.
- Унинг сўзларига кўра, АҚШ "бошқа томонга ёрдам бериш орқали бутун минтақадаги манфаатларни ҳимоя қиляпмиз", деган даъво қилмоқда, аммо минтақадаги кўп давлатлар қўллаган резолюцияга қарши овоз берди.
Исроилнинг жавоби
Исроилнинг БМТдаги доимий вакили Дани Данон резолюция рад этилишидан қониқиш билдирди. Унинг айтишича, анклавдаги оғир шароитлар учун ХАМАС жавобгар. Исроил ўзини ҳимоя қилишни ва гаровдагиларни озод қилиш учун курашни давом эттиради.
- "Бугун Хавфсизлик Кенгашида адолат томонида туриш имконияти бор эди. Ҳар бир томонни тарих ёдга олади", деди Данон.
Фаластиннинг муносабати
Фаластиннинг БМТдаги доимий кузатувчиси ўринбосари Мажид Бамия ҳеч кимнинг тинч аҳолига оммавий зўравонлик қилиш, геноцид ёки ҳудудларни босиб олиш ҳуқуқи йўқлигини таъкидлади.
- "Исроил айнан шуларни Ғазода амалга оширмоқда", деди у.
- "Бу ҳаракатлар ҳеч қандай музокарани истамаслик ва ўт очишни тўхтатиш қарорининг йўқлиги билан боғлиқ", дея қўшимча қилди.
БМТ Бош Ассамблеяси раиси фикри
БМТ Бош Ассамблеяси раиси Филемон Янг резолюцияга вето қўйилишини "Ҳавфсизлик Кенгаши фаолиятидаги паралич" сифатида баҳолади.
- "Бу паралич тезкор халқаро кризисларга жавоб беришни қийинлаштиради", деди Янг.
- Унга кўра, Бош Ассамблея Ҳавфсизлик Кенгашининг ҳаракатсизлиги шароитида ташаббус кўрсатиши ва чоралар кўриши лозим.
БМТ материаллар асосида
Абу Муслим тайёрлади
