Нью-Йоркда намойишчилар Манҳеттенда транспорт қатновини тўсиб қўйишди. Полиция намойишчиларни тарқатиш учун қалампирли газдан фойдаланган. Қонунбузарларнинг бир қисми ушланган.
Филадельфияда намойишчилар билан тўқнашувда камида 13 полиция ходими жароҳат олди. Намойишчилар тўртта полиция машинасига ўт қўйишди. Тартибсизликлар бўлган жойларда дўконлар ойналари синган ва кўплаб дўконлар талон-тарож қилинмоқда. Норозилик намойишларида минглаб ёшлар қатнашмоқда. Шаҳарда комендантлик соати жорий этилди.
Миннеаполисда намойишчилар комендантлик соатларини жорий этиш тўғрисидаги ҳукумат буйруғига писанд қилмадилар. Аммо ўтган кун давомида жиддий тўқнашувлар ҳақида хабарлар бўлмаган. Шаҳар арафасида кўплаб бинолар, жумладан, полиция бўлинмаси ёқиб юборилди.
Оклендда полиция зўравонлигига қарши норозилик намойиши пайтида полиция ходими отиб ўлдирилган. Унинг ҳамкасби жароҳат олган. Ушбу воқеадан кейин полиция 200 га яқин намойишчини ҳибсга олди. Тезда тартибсизликларга айланиб кетган йиғилишда жами 7500 дан ортиқ киши қатнашди. Намойишчилар йўлда турган дўконларга ҳужум қилишди ва талашди, машиналарга ўт қўйишди ва полиция ходимларига ҳужум қилишди.
Шунингдек, Лос-Анджелес, Атланта, Колумбус, Хьюстон, Даллас, Лас-Вегас, Детройт, Луисвилл, Майами, Денвер ва бошқа шаҳарларда тартибсизликлар ҳақида хабарлар бўлган.
Эслатиб ўтамиз, 25 май куни Миннеаполис полициясига бир фуқаро Cup Foods Minnesota кафесида сохта ҳужжатларни ишлатмоқчи бўлганлиги тўғрисида хабар келиб тушган. Воқеа жойига етиб келган ҳуқуқ-тартибот идоралари ходимлари гумондор Жорж Флойдни топиб, ундан машинадан тушишни талаб қилишди. У қаршилик кўрсатган, натижада полициячилардан бирининг сўзларига кўра, "соғлиғи ёмонлашган" ва у касалхонада вафот этган. Кейинроқ ижтимоий тармоқларда ушбу одамнинг ҳибсга олиниши видеоси пайдо бўлди. Видеода полиция ходими Флойднинг бўйнига тиззаси билан босгани, у эса бўғилиб, нафас ололмаётганини айтади. Ушбу воқеадан кейин Миннесота штатининг тўртта полиция ходими ишдан бўшатилди. Эртаси куни Миннеаполисда "Жорж учун одил суд" шиори остида норозилик намойишлари бошланди. Кейинги бир неча кун ичида тартибсизликлар АҚШнинг ўндан ортиқ шаҳарларини қамраб олди.