Хитой Россияга ноутбук ва смартфон етказиб беришни кескин қисқартириб, Россия Федерациясига электроника ускуналари экспортини барбод қилди. Бу ҳақида Хитой божхона хизмати статистик маълумотларини эълон қилган ахборот агентликлари хабар бермоқда. Россия армиясининг Украина ҳудудига бостириб кириши бошланганидан кейин санкциялар контекстида Кремл "ноқулай" маълумотлар тарқалишидан қўрқиб, ўз статистик маълумотларини яширмоқда.
Хитой томонидан олинган маълумотларга кўра, жорий йилнинг апрел ойида етказиб бериш 2021 йилнинг шу даврига нисбатан бир неча баравар камайган, деб ёзади The Moscow Times.
Ўтган йил апрел ойида Хитой 2 миллиондан ортиқ смартфон жўнатди, бу йил эса 830 000 га яқин; бир йил олдинги 350 минг ўрнига атиги 43 мингта ноутбук келтирилди.
Россия нашрларининг таъкидлашича, Хитой Россия Федерацияси санкциялар остида электроника етказиб беришни ташкил қилиши мумкин бўлган ягона давлат бўлиб қолмоқда.
"Умуман олганда, расмийларнинг шов-шувли хабарлари ва Европа ва Америка товарларини осиёлик ҳамкорнинг маҳсулотлари билан алмаштириш ваъдаларига қарамай, Хитой билан савдо жуда ёмон кетмоқда",  деб таъкидлайди Россиянинг "Fontanka" нашри журналисти.
Импортнинг умумий ҳажми сезиларли даражада - 35% га камайди.
Россия электроника бозори учун безовта қилувчи янгилик Американинг Hewlett-Packard компаниясидан келди, у бир кун олдин Беларус ва Россиядан ўзининг чиқишини расман эълон қилди.
Аввалроқ у Россия армиясининг Украина ҳудудига бостириб кириши муносабати билан ҳар икки мамлакатдаги фаолиятини тўхтатган эди. Шу билан бирга, бозорлардан ҳозирги тўлиқ чиқиш Россия Федерацияси ва Беларусда бизнесни давом эттиришнинг мақсадга мувофиқ эмаслиги билан изоҳланади.