“Санкциялар Россиянинг Украинага бостириб киришига ёрдам бераётганларга, жумладан, Вагнер гуруҳи, бир қанча мудофаа компаниялари ва РЖД (Россия темир йўллари)ни нишонга олади”, - дея маълум қилди Британия Ташқи ишлар вазирлиги.
Бугунги санкциялар Россиянинг ноқонуний босқинини қўллаб-қувватловчи асосий тармоқларга, жумладан, Россия темир йўллари ва Россиянинг асосий учувчисиз учиш аппаратлари ишлаб чиқарувчиси «Кронштадт» мудофаа компаниясига қаратилган. Президент Зеленскийга суиқасд уюштириш вазифаси юкланган россиялик ёлланма аскарлардан ташкил топган “Вагнер гуруҳи” ҳам санкциялар остида қолган.
Яна олтита банк, жумладан, аввалроқ санкцияга учраган олигархлар Михаил Фридман, Петр Авен ва Герман Хан томонидан асос солинган Альфа-Банк ҳам зарар кўрди. Шунингдек, Газпромбанк, Россельхозбанк ҳам санкцияга учради.
Дунёнинг энг йирик олмос ишлаб чиқарувчиси «Алроса» ҳам санкцияга тортилди.
Шунингдек, миллиардер нефт магнати Евгений Швидлер, Тинькофф Банк асосчиси Олег Тиньков, Россиянинг энг йирик банки Сбербанк бош директори Герман Греф ва Россия ташқи ишлар вазири Сергей Лавровнинг ўгай қизи Полина Ковалевага ҳам санкция қўйилган. Россия томонидан Мелитопол “мэри” этиб тайинланган Галина Данильченко ҳам санкцияга тортилди – бу ҳозир Украинада жойлашган Россия қўшинлари билан ҳамкорлик қилган шахс биринчи марта санкцияга тортилиши.
Бугун санкцияланганларнинг барчаси Буюк Британиядаги активлари музлатилади, яъни Буюк Британия фуқароси ёки компанияси улар билан бизнес қила олмайди ва саёҳат қилиш тақиқланганларга Буюк Британияга кириш ёки ундан чиқиб кетиш тақиқланади.
Бугунги санкциялар босқиндан кейин Буюк Британия томонидан санкция жорий қилинган банк активларини 500 миллиард фунт стерлингга (тахминан 658 миллиард доллар) ва олигархлар ва уларнинг оилаларининг соф бойлигини 150 миллиард фунт стерлингга (тахминан 197 миллиард доллар) етказади.
Жами 59 нафар янги жисмоний ва юридик шахс Россияга қарши, 6 нафари Беларусга қарши санкциялар рўйхатига киритилди.
Хусусан, белорус банки "Дабрабыт", "Белбизнеслизинг", "Минотор-Сервис", "Авиакомпания Трансавиакспорт", "Белинвест-инжиниринг", "КБ Радар" компаниялари санкццияга тортилди.
"Бу олигархлар, бизнесменлар ва ёлланма каллакесарлар бегуноҳ фуқароларнинг ўлдирилишида иштирок этишган ва бунинг учун тўлашлари тўғри. Путин учун ҳеч қандай иллюзияга йўл қўймаслиги керак - биз иттифоқчиларимиз билан бирлашганмиз ва Россия иқтисоди Украинадаги муваффақиятсизлигини таъминлаш учун «мурватлар»ни бурашда давом этамиз. Ҳеч қандай чекиниш бўлмайди", - дея изоҳ берди Британия ташқи ишлар вазири Лиз Трасс.
Буюк Британия Украинага бостириб кирганидан бери Россияга қарши санкциялар режими остида 1000 дан ортиқ жисмоний ва юридик шахсларга нисбатан санкциялар жорий қилган.
Манба: УНН
