Бугунги кунга қадар Саудия Арабистонида 31 938 киши COVID-19 юқтириб олган ва 209 кишининг ўлим ҳолати қайд этилган. Бу Форс кўрфази ҳамкорлик кенгаши мамлакатлари орасида энг юқори кўрсаткичдир.
"Касалликнинг ҳақиқий тарқалиши айтилганидан уч-тўрт баравар юқори бўлиши мумкин", - дейди МEE манбаларидан бири, анонимлик шарти билан.
"Саудия Арабистони соғлиқни сақлаш органлари июн ойида касаллик кўрсаткичи чўққига етишини кутмоқда".
Манбалардан бирига кўра, "COVID-19" билан оғриган беморлар дастлаб давлат шифохоналарига ётқизилган, аммо "энди давлат шифохоналарига ҳаддан ташқари оғир юк бўаётгани сабабли, уларни хусусий касалхоналарда даволаш тўғрисида кўрсатмалар мавжуд".
2 апрель куни Саудия Арабистони ушбу касалликнинг олдини олишга қаратилган саъй-ҳаракатлар доирасида муқаддас Макка ва Мадина шаҳарлари учун 24 соатлик комендант соати жорий этди.
Комендантлик соати 26 апрель, муқаддас Рамазон ойи бошланганидан кейин олиб ташланди, аммо Маккада чекловлар кучда қолди.
25 мартдан бошлаб қироллик бутун мамлакат бўйлаб ёпиб қўйилди, жумладан Макка, Мадина ва ар-Риёддан кириш ва чиқиш тақиқланди, шунингдек, барча 13 вилоят ўртасида ҳаракатланиш чекланди.
Макка касалликнинг авж олган ўчоғи деб ишонилади, шунинг учун бу ерда энг қатъий чоралар давом этмоқда. Июл ойида бошланадиган Ҳаж бу йил бекор қилиниши ёки қисқартирилиши кутилмоқда.
Яна бир тиббий манбага кўра, бошқа вилоятлар бу ҳолатлар сони 20 фоизга кўпайган тақдирда тўлиқ локдаунга қайтишлари мумкин.
Манбанинг таъкидлашича, Қизил денгиз соҳилидаги Жидда шаҳрида 500 койкали янги касалхона, шунингдек, тобора кўпайиб бораётган касалликларни даволаш учун яна иккита муассаса очилган.