332-боб. «Аллоҳим, агар хоҳласанг, мени кечир», деб айтишнинг кароҳияти ҳақида (Аллоҳдан бирор нарса сўралаётганда жазм ва қатъият ила сўралади)
- Душанба, Окт 24 2022
- 15173 марта кўрилди
1742/1. Абу Ҳурайрадан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Сизлардан бирортангиз «Аллоҳим, агар хоҳласанг, мени кечир» ёки «Аллоҳим, агар хоҳласанг, менга раҳм қил», деб айтмасин. Балки жазм ва қатъият билан сўрасин. Чунки Аллоҳ таолони (бир нарса беришга ҳеч ким) мажбурлай олмайди», дедилар. Имом Бухорий ва Муслим ривоятлари.
Муслимнинг ривоятларида «Лекин қасд қилиб, қаттиқ сўрасин. Аллоҳ наздида бирор (хоҳ дунёвий, хоҳ ухровий) нарсанинг каттаси бўлмайди, албатта беради» бўлиб келган.
1743/2. Анасдан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Қачон сизлардан бирингиз дуо қилса, қатъият ила тиласин. «Аллоҳим, агар хоҳласанг, бергин», деб қатъиятсизлик ила сўрамасин. Чунки Аллоҳни (ҳеч ким бир нарса беришга) мажбурлай олмайди», дедилар. Имом Бухорий ва Муслим ривоятлари.