АҚШ Президенти Дональд Трамп 1987 йилда СССР КГБ томонидан ёлланган, деб Facebookдаги ўз постида маълум қилди Қозоғистон Миллий хавфсизлик қўмитасининг собиқ раиси Алнур Мусаев. Унинг сўзларига кўра, ўша пайтда 40 ёшда бўлган америкалик бизнесмен Трамп Совет давлат хавфсизлигининг Олтинчи бошқармаси томонидан ёлланган ва “Краснов” тахаллусини олган.

“Дональд Трамп ФСБ томонидан назоратда бўлиб, тўрга тобора чуқурроқ илинаётганини кўрсатувчи кўплаб билвосита далиллар бор, улар ОАВда эълон қилинган. Вербовка қилинувчанлик деган тушунча мавжуд. КГБ-КНБдаги оператив фаолиятим тажрибасидан келиб чиқиб аниқ айта оламан – Трамп идеал вербовка қилиниши мумкин бўлган одамлар тоифасига киради. Менда ҳеч қандай шубҳа йўқки, Россияда АҚШ Президенти ҳақида компромат мавжуд ва Кремль кўп йиллар давомида Трампни дунёнинг етакчи давлатининг президентлик лавозимига илгари суриб келган”, – деб ёзади қозоқ сиёсий фаоли.

Мусаевнинг сўзларига кўра, “АҚШнинг ҳукмрон элитаси ўз Президентларининг Кремлга чуқур боғлиқлигини жуда яхши тушунади, аммо буни очиқ тан олиш жаҳон давлатининг мақомига зид”.

“Албатта, улар тергов ўтказмоқда, Оқ уй раҳбарининг жамоаси аъзолари устидан суд жараёнлари олиб бормоқда, танқидий материаллар эълон қилмоқда. Таниқли шахслар, конгрессменлар Трампни хиёнатчи деб атайди. Бунинг барчаси Трампнинг ўз лавозимини тарк этишига ёки уни Москва агенти сифатида тан олмасдан мулойим импичментга олиб келишга умид қилиб амалга оширилмоқда. Менимча, уларда бу ишдан бирон нарса чиқмайди. Дональд Трамп автократ сифатида, ҳақиқий диктатордек, Оқ уйнинг Овал кабинетини тирноқлари ва тишлари билан ушлаб турибди”, – деди собиқ разведкачи.

“Путин жаҳон ҳамжамиятини масхара қилаётгани аниқ, у ўзининг маккор табассуми билан, ўзига хос бўлган усулда, Трампнинг Кремлга боғлиқлигини инкор қилаётган пайтда. Трамп эса унинг ўйинини фаол ва ҳеч қандай тардидсиз давом эттирмоқда, ўз махфий ҳамкорлигини инкор қилиб, президентлик курсисини сақлаб қолишга ҳаракат қилмоқда. Бунинг барчаси хавфли чегарада олиб борилмоқда ва автократлар, авантюристлар ва жиноий муҳит вакилларига хосдир”, – деб хулоса қилган Мусаев