Вагнер террорчилик гуруҳи раҳбари Евгений Пригожин билан самолётда унинг икки яқин шериги ва Суриядаги уруш иштирокчилари ҳалок бўлди. Бу ҳақда Досье веб-сайтининг материалида айтилган.
Федерал ҳаво транспорти агентлиги томонидан эълон қилинган рўйхатда таъкидланганидек, Пригожин самолётида бўлган йўловчилардан иккитаси - унинг энг яқин шерикларидан, бошқалар эса Сурияда Вагнер гуруҳининг ёлланма аскарлари сифатида жанг қилишган.
Валерий Чекалов – 2000-йиллардан бери у билан ишлаган Пригожинга энг яқин Конкорд компаниясининг менежерларидан бири.
Маълумотларга кўра, Чекалов Пригожин ушбу бозорни эгаллаб олганида Москвадаги мактаб овқатланиш лойиҳасини бошқарган.
Кейинчалик Чекалов Конкорд армиясининг ҳарбийларни озиқ-овқат билан таъминлаш бўйича шартномалари учун жавоб берган.
Чекалов Пригожиннинг Россиядан ташқаридаги барча "фуқаролик" лойиҳаларини – геологик қидирув, нефть қазиб олиш ёки қишлоқ хўжалигини назорат қилган.
У Вагнер гуруҳининг логистика кўмаги учун масъул бўлган, Суриядаги ва Африкадаги барча лойиҳалар билан боғлиқ бўлган Нева ОАЖни бошқарган.
Дмитрий Уткин. Вагнер гуруҳидаги Пригожиннинг ўнг қўли, у ерда қўмондонлик ва жанговар тайёргарлик учун масъул бўлган.
Евгений Макарян. Жетон рақами М-2300, чақирув белгиси "Макар". Полиция кичик лейтенанти, собиқ «участковой». У 2016 йил март ойида Вагнер гуруҳига қўшилганди.
2017 йил январь ойида Хшам яқинида Америка самолётлари томонидан ўққа тутилган Вагнернинг Суриядаги тўртинчи штурм отряди таркибида бўлган. Ўшанда чап сонидан яраланган.
Сергей Пропустин. Жетон рақами М-0394, чақирув белгиси "Кедр". Прапоршик, иккинчи чечен урушида қатнашган. 2015 йил март ойида Вагнер гуруҳига қўшилган. У Кирил Тихонович (чақирув белгиси "Чукча") ротасида жанг қилган – бу вагнерчиларнинг жанговар бўлинмаларидан бири, 2016 йилдан бери иккинчи разведка-штурм отряди деб номланган. Пригожин 2016 йилда кўплаб шахсий соқчиларни ушбу таркибдан жалб қилганди.
Александр Тотмин. Жетон рақами М-5534, чақирув белгиси "Тот".
Николай Матусеев. Журналистлар Вагнер гуруҳи рўйхатидан бундай исмли одам топа олишмади. Лекин у ерда Николай Матусевич номи бор эди. Жетон рақами М-2559.  Вагнер таркибида 2017 йил январдан. Сурияда тўртинчи штурм отрядида ўқчи бўлиб хизмат қилган.
2023 йил 23 июн куни кечқурун Пригожин Москвага "юриш" эълон қилди. Эртаси куни у Россия ҳукумати билан келишиб, қўшинларни олиб чиқди. Путиннинг матбуот котиби Пригожин Беларусга кетганини айтди.
30 июн куни ГУР раҳбари Кирилл Буданов ФСБ Пригожинни ўлдириш ҳақида топшириқ олганини айтди, аммо бу кенг кўламли операция бўлиб, вақт талаб этарди.
23 август куни Россияда Пригожиннинг самолёти қулаб тушди. У Россия ҳаво ҳужумига қарши мудофаа тизими томонидан уриб туширилган бўлиши мумкин. «Вагнер» гуруҳи раҳбари ва самолётдаги барча одамлар ҳалок бўлди.