АҚШ президенти Дональд Трамп маъмуриятининг собиқ давлат котиби Майк Помпео 3 апрель куни Украинага келади.
Бу ҳақида Politico ўз манбаларига таяниб хабар берди, деб ёзади Цензор.НЕТ.
Нашрнинг қайд этишича, ташриф 2024 йилги президентлик сайловларида иштирок этиши мумкин бўлган Помпеога Украинани қўллаб-қувватлашини намойиш этиш имконини беради.
Ушбу ташриф туфайли, деб ёзади Politico, Помпео Украинага нисбатан кўпроқ шубҳа билан қарайдиган Дональд Трамп ва Рон Десантис каби номзодлардан узоқлашиши мумкин.
Помпеонинг ташриф дастури ҳозирча номаълум – хусусан, унинг Украина президенти Владимир Зеленский билан учрашиши аниқ эмас.
Майк Помпео 2018 йилдан 2021 йилгача АҚШ Давлат котиби бўлган. Бунгача у бир йил давомида Марказий разведка бошқармасини бошқарган.