Украина Қуролли кучлари Харьков вилоятида бир қатор аҳоли пунктларини озод қилиш билан якунланган тезкор қарши ҳужум пайтида Россия бўлинмаларидан 200 га яқин ҳарбий техникани тортиб олди. Босиб олинган ҳудудлардан ҳаётини сақлаб қолиш учун қочган душман катта миқдордаги қурол ва ўқ-дориларни қолдирди, улар энди Украина қўшинлари томонидан қўлланилади, деб ёзади Foreign Policy нашри Украина ҳарбий амалдорига таяниб.
Қўлга олинган рус техникаси таркибида БМП-2 дан ўнлаб танкларгача, жумладан, 1980-йилларда ишлаб чиқарилган Т-80 ларгача мавжуд бўлиб, таҳлилчиларнинг фикрича, улар рус қўшинларининг жанговар қобилиятининг ярмини ташкил қилади.
"Улар танклари, артиллерияси, махсус техникаси, кўплаб зирҳли техникаларини ташлаб кетишди ва шунчаки ҳаётларини сақлаб қолишга ҳаракат қилишди", — деди манба.
Материалда қайд этилишича, 6 сентябрдан бери Украина Қуролли кучлари 3800 квадрат километрдан ортиқ ҳудудни озод қилган. Бу рус армияси беш ойлик ҳужумда эгаллаб олганидан кўп.
Ҳарбий техникада катта йўқотишлардан сўнг, баъзи рус бўлинмалари сезиларли даражада заифлашди. Хусусан, Москвани ҳимоя қилиш вазифаси юкланган РФ Қуролли Кучларининг 1-гвардия танк армияси Харьковдан қаттиқ таназзулга учраган ҳолатда олиб чиқилди.
Британия Мудофаа вазирлиги Россияга Харьков вилоятида йўқолган салоҳиятни тиклаш учун бир неча йиллар керак бўлади, деб ҳисоблайди.