Қўшма Штатлар Эроннинг Safiran Airport Services компаниясини Россияга Эрон дронлари етказиб беришни ташкил қилишда айблаб, шунингдек, Вашингтон фикрига кўра, Эрон дронларини ишлаб чиқариш билан шуғулланадиган яна учта компанияга нисбатан санкциялар жорий қилди. Reuters хабарига кўра, Теҳрон дронлар етказиб берилганлигини рад этди.
Paravar Pars Company, Design and Manufacturing of Aircraft Engines ва Baharestan Kish Company компаниялари дронларни ишлаб чиқиш, ишлаб чиқариш ва сотишда иштирок этганликда айбланган.
Алоҳида равишда Молия вазирлиги Paravar Pars компаниясини АҚШ ва Исроил ишлаб чиқарган учувчисиз учиш аппаратлари реверс-инжинирингида, аниқ моделлар ҳақида хабар бермасдан айблади. Баъзи Эрон дронлари ҳақиқатан ҳам бошқа мамлакатларнинг учувчисиз учиш аппаратларига, жумладан 2011 йилда Эрон ҳарбийлари томонидан қўлга олинган АҚШнинг RQ-170 Sentinel ҳаво разведкачи учувчисиз аппаратларига асосланган.
Июл ойи ўрталарида Россия президенти Путин Эронга ташриф буюриб, эронлик ҳамкасби Иброҳим Раиси ва Туркия президенти Ражаб Тоййиб Эрдўғон билан музокаралар ўтказди. АҚШ расмийларига кўра, Украинадаги уруш учун Эрон қуролларини сотиб олиш масаласи ҳам муҳокама қилинган. Қўшма Штатларнинг фикрича, Россия катта эҳтимол билан Mohajer-6 ва Shahed серияли юзлаб учувчисиз учиш аппаратларини сотиб олишни режалаштирган.
"Қўшма Штатлар Россия ва Эронга қарши санкцияларни қатъий қўллайди, Эронни ва Россиянинг Украинага қарши босқинчилик урушини қўллаб-қувватлайдиган барчани жавобгарликка тортади", деди молия вазирининг терроризм ва молиявий разведка бўйича ўринбосари Брайан Нельсон.
Август ойида CNN хабар берганидек, бир гуруҳ россияликлар Эронда маҳаллий ишлаб чиқарилган учувчисиз учиш аппаратлари билан ишлаш бўйича ўқиб келган. Журналистларнинг таъкидлашича, бу маълумот  Россия Федерациясининг Эрондан дронлар харид қилишга тайёрлигини кўрсатади.
Ҳозир Россия урушда ҳаводан разведка ва аниқ зарбалар учун маҳаллий "Орлан" дан фойдаланмоқда. Украина ҳарбийлари ҳаво ҳужумлари учун Америка дронлари ва турк «Байрактар»ларидан фойдаланади. Ҳозирча Вашингтон Москванинг реакциясидан қўрқиб, кучлироқ Gray Eagle дронларини Киевга беришдан бош тортмоқда.