"Пайшанба куни Брюсселда НАТО мудофаа вазирлари Европа ва Шимолий Атлантика иттифоқи зонасини ҳимоя қилиш бўйича янги комплекс режа қабул қилди. Унда Ғарб иттифоқи Россиядан эҳтимолий ҳужумларга, шунингдек, терроризмнинг давом этаётган таҳдидига қандай жавоб беришини белгилайди. Бу совуқ уруш тугаганидан буён унинг биринчи кенг қамровли режаси. Бу анъанавий ҳарбий ҳужумлар ва гибрид урушлардан кибер ҳужумларга ва дезинформацияга, шунингдек, уларнинг комбинацияларига ва бир вақтнинг ўзидаги ҳужумларга, масалан, Болтиқ ва Қора денгиз ҳудудларида турли хил сценарийларни қамраб олади", деб хабар беради журналист Пауль-Антон Крюгер.
"Иттифоқ 2014 йилдан бери ўзгарган "хавфсизлик вазиятидан шундай хулоса чиқаради", - дейди Брюссель. НАТОнинг иттифоқни ҳимоя қилишга қайта йўналтирилишига Россия томонидан Қримнинг қўшиб олиниши туртки бўлди. Мудофаа режаси Москва ўзини оралиқ масофадаги ядро қуроллари билан қуроллантираётгани ва янги қурол-яроғ тизимларини ишлаб чиқаётганига ҳам жавобдир. Масалан, Россия қуролли кучлари яқинда жанговар роботларни машқларда синаб кўрди, улар сунъий ақл-идрокдан фойдаланиш устида ҳам иш олиб бормоқда ва космик тизимларни модернизация қилмоқда", - дейилади мақолада.
"Германия мудофаа вазири Аннегрет Крамп-Карренбауэр (ХДС) айтишича, "Россия таҳдидлари ва ҳаракатларига нисбатан жуда аниқ позиция" эгаллаши керак. (...) У Россиянинг Қора денгиз минтақасидаги агрессив хатти-ҳаракатлари ва Болтиқбўйи давлатлари устидан ҳаво ҳудуди бузилишига ишора қилди".
"Шу билан бир пайтда иттифоқ Кремл билан мулоқот учун очиқ бўлиб қолавериши керак, деди Крамп-Карренбауэр. Яқинда Россия НАТО билан алоқаларни узиши ва иттифоқдаги ваколатхонасини ёпиши ҳақида маълум қилди. НАТО бош котиби Йенс Столтенберг чоршанба куни Россия билан муносабатлар совуқ уруш тугаган даврдан бери энг паст даражага етганини қайд этди. Бунга НАТОда аккредитациядан ўтган Россиянинг саккиз нафар дипломати чиқариб юборилиши сабаб бўлди. Иттифоқ буни дипломатларнинг разведка фаолияти билан изоҳлади".
"Пайшанба куни эса можаролар янада чуқурроқ характерга эга экани аён бўлди: Россия ташқи ишлар вазири муовини Андрей Руденко НАТОни Украинанинг иттифоқка аъзолигига қўйилган ҳар қандай кейинги қадам олиб келиши мумкин бўлган оқибатлар ҳақида огоҳлантирди".
"Янги мудофаа ва тўхтатиб туриш режаси билан бирга, НАТО вазирлари стратегияни амалга ошириш учун зарур бўлган ҳарбий имкониятларни ривожлантириш бўйича тўрт йиллик режаларни қабул қилди. Гап ҳаво мудофааси, кибер қобилият ва разведка қобилиятлари ҳақида кетяпти. (...) Мудофаа вазирлари, айниқса, кибер секторда мудофаа учун муҳим бўлган технологияларнинг хусусий компаниялари томонидан ривожланишини қўллаб-қувватлаш учун бир миллиард евро миқдорида маблағ ажратишга рози бўлди. Бўлажак можаролар "нафақат ўқ ва бомба билан, балки байтлар ва катта маълумотлар билан ҳам жанг қилинади", - дейди Столтенберг.
"Қолаверса, мудофаа иттифоқи стратегик йўналиш ҳақида қўшимча баҳсларга эга бўлади. Аввало, Франция Европага кўпроқ мустақилликни, мухториятини талаб қилади, Қўшма Штатлар эса, НАТОнинг Хитой билан алоқаларнинг кескинлашишида муҳимроқ рол ўйнашини истайди. НАТО йиғилиши олдидан Европа Иттифоқи мудофаа вазирларининг йиғилишида Крамп-Карренбауер Финляндия, Нидерландия, Португалия ва Словения билан биргаликда ЕИ тезкор жавоб қайтариш кучларини шакллантириш таклифини тақдим этди. (...) Афғонистондан қўшинлар шошқалоқлик билан олиб чиқилгач, Европа иттифоқчилари АҚШ кўмагига боғлиқ экани яна бир бор аён бўлди", - деб ёзади Süddeutsche Zeitung.
Манба: Süddeutsche Zeitung
Абу Муслим таржимаси
