Шу йилнинг июн ойида Илон Маск компанияси томонидан космосга бизнинг «Turksat 5B» сунъий йўлдошимиз учирилишининг олдини олиш учун уриниб, АҚШдаги арман ва юнон лоббиси АҚШ Федерал фуқаро авиация бошқармасига мактуб ёзди. Учувчисиз жанговар аппаратларга ҳам сигнал узатадиган сунъий йўлдош туфайли Туркия минтақада янада кучлироқ бўлади.
Туркиянинг саккизинчи сунъий йўлдошини космосга учиришга тайёргарлик ишлари арманлар ва юнонларни хавотирга солмоқда. АҚШда фаолият юритаётган арман ва юнон лоббиси турк сунъий йўлдошини космосга учириши лозим бўлган Илон Маскнинг «SpaceX» компаниясини тўхтатиш устида зўр бериб ишлашни бошлади.
Америка Қўшма Штатларида юнон-америка етакчилик Кенгаши ва Америка арманлар Миллий қўмитаси «Turksat 5B» алоқа сунъий йўлдоши ҳарбий нуқтаи назардан хавфли қўлланиши мумкин, деб АҚШ Федерал фуқаро авиацияси бошқармасига мактуб билан мурожаат қилди. Унда айтилишича: «АҚШ ўз иттифоқчилари – Арманистон ва Грециянинг манфаатларини ҳисобга олиши керак. Америка Федерал фуқаро авиацияси бошқармаси бу коинотга учиришнинг олдини олиши керак. Туркия космосдаги сунъий йўлдошлар ва ердаги ҳарбий салоҳиятидан самарали фойдаланишга қодир бўлиб қолган. Бу эса таҳдид элементларига эга. Кипр ва Эгей денгизида ҳам турклар таҳдид соляпти». Хорижий ОАВ хабарларига кўра, лоббичилар Туркия минтақада ҳарбий жиҳатдан кучлироқ мавқега эга бўлди.
Хорижий оммавий ахборот воситалари хабарларига кўра, лоббичилик доиралари Туркия минтақада кучли ҳарбий позицияга айланганини, АҚШ билан дўстлигига қарамай С-400ни сотиб олганини ва Россия билан яқинлашиш фонида дўстона эмас, душман мамлакат деб ҳисобланиши кераклигини таъкидламоқда. Бундан ташқари, Туркиянинг ташқи сиёсатида ҳам Россияга, ҳам АҚШга яқин бўлишга уринаётгани ва бу хавфли ҳаракат чизиғи экани ҳам иддао қилинмоқда.
2021 йил 8 январ куни Туркиянинг еттинчи сунъий йўлдоши «Turksat 5A» Флорида штатидаги Канаверал космодромидан фазога учирилди. 35 дақиқадан сўнг йўлдош сигналларни жўната бошлади. Арман лоббиси ўшанда ҳам сунъий йўлдош учирилишига қаршилик кўрсатиш учун АҚШга босим кўрсатишга уринди, лекин натижаларга эриша олмади. Жорий йилнинг июн ойида Илон Маскнинг компанияси космосга саккизинчи турк сунъий йўлдоши - «Turksat 5B»ни учиради. Космосда яратилган сунъий йўлдош колониялари Туркияни нафақат алоқа соҳасида, балки ҳарбий соҳада ҳам кучлироқ қилади. Бу йўлдошлардан келаётган сигналлар ёрдамида турли, жумладан, ҳарбий мақсадларда фойдаланиладиган учувчисиз учиш аппаратларини бошқариш амалга оширилади. Шундай қилиб, фазодаги куч ердаги кучни белгилаб беради.