Euro-Med инсон ҳуқуқлари мониторининг бугун эълон қилинган янги ҳисоботига кўра, 2023 йил октябрь ойидан бери Исроил оккупация армияси Ғазо секторини тўғридан-тўғри бомбардимон қилиши натижасида ҳар куни ўртача 21 нафар фаластинлик аёлни ўлдирмоқда. Бу шуни англатадики, қамал, очлик ва тиббий ёрдамнинг етишмаслиги туфайли вафот этганларни ҳисобга олмаганда, ҳар соатда бир аёл ҳалок бўлмоқда.
Ташкилотнинг дала тадқиқотчилари томонидан минглаб аёлларнинг ўлими ҳолатлари ҳужжатлаштирилган, уларнинг кўпчилиги оналар ёки репродуктив ёшдаги аёллар бўлган. Улар ўз уйларида, кўчирилганлар лагерларида, вақтинчалик бошпаналарда ёки хавфсизлик излаб кетаётган йўлларида, кўпинча қўлларида болалари билан ҳалок бўлишган.
«Ғазода аёлларнинг ўлдирилишининг мисли кўрилмаган суръати, айниқса оналарга нисбатан оммавий қатлларнинг тизимли амалиётини акс эттиради», — деб таъкидлайди ҳуқуқ ҳимоячилари.
Ҳуқуқ ҳимоячиларининг сўзларига кўра, бу тенденция фаластинлик аёлларни ўлдиришни геноцид қуроли сифатида қўлланилаётганини кўрсатади, бу эса халқаро ҳуқуққа кўра жиноят ҳисобланади.
Расмий тиббий маълумотлар Ғазодаги 582 кунлик тажовуз давомида 12 400 нафар фаластинлик аёл, жумладан 7 920 нафар она ўлдирилганини тасдиқлайди. Шунингдек, ҳомиладор ва эмизикли аёллар ўлимининг кескин ўсиши қайд этилмоқда.
«60 000 дан ортиқ ҳомиладор аёл очлик, тўйиб овқатланмаслик ва тиббий ёрдамнинг етишмаслиги туфайли ҳаёт учун хавф остида қолмоқда», — дейди Фаластин Соғлиқни сақлаш вазирлиги.
Ҳисоботда айтилишича, Ғазода бола туғилишининг олдини олиш 1948 йилги БМТнинг Геноцид конвенциясининг 2(d) моддасига кўра геноцид аломатларидан бирига айланган. Бу қуйидагиларни ўз ичига олади: репродуктив ёшдаги аёлларни ўлдириш; ҳомиладор аёлларга қасддан ҳужум қилиш; туғруқхона ва оналик ёрдами тизимини вайрон қилиш; дори-дармон ва тиббий ускуналар етказиб беришни тақиқлаш; оналар ва чақалоқлар учун очлик ва озиқ-овқат етишмаслиги, бу эса секин ўлимга ва оғир асоратларга олиб келади.
Бундан ташқари, фаластинлик аёллар болалари, эрлари, уй-жойларини йўқотганликлари, оилаларининг хавфсизлигини таъминлай олмаётганликлари туфайли психологик жароҳатлар билан юзма-юз келмоқдалар. Қайта-қайта кўчишлар ва бошпананинг йўқлиги хавотир, депрессия ва посттравматик стрессни кучайтиради.
Euro-Med Monitor барча жаҳон давлатларини Ғазодаги геноцидни зудлик билан тўхтатиш ва Исроилга қарши иқтисодий, дипломатик ва ҳарбий санкциялар киритиш учун чоралар кўришга чақиради.
