Пайғамбармиз Муҳаммад Мустафо соллаллоҳу алайҳи васалламга юборилган шариатнинг ўзига хос жиҳатларидан бири бошқа пайғамбарларнинг шариатларига нисбатан енгилликлар, рухсатлар берилганидир. Биргина намознинг ўзида касал ва узрли инсонлар, қариялар, шунингдек, мусофир кишиларга хдм бир қатор енгилликлар берилган. Унга кўра мусофир кишилар тўрт ракатли фарз намозларни икки ракатга қисқартириб ўқишлари жоиз экани оят ва ҳадислар билан собит бўлган. Равотиб суннат намозлар эса қаср қилинмаган ҳолда тўлиқ ўқилади. Фарз намозларнинг қаср қилиниш масаласида бирор эътиборга молик ихтилоф йўқ. Буни барча мазҳаб вакиллари бир овоздан эътироф қиладилар. Аммо фарзларга давомли равишда тобеъ бўлган равотиб суннатлар сафарда ўқиладими ёки уларни тарк қилинадими деган масалада бироз ихтилоф бўлиб, Имом Нававий айтганларидек, жумҳур уламолар наздида сафарда суннати равотибларни ўқиш мустаҳаб амалдир. Аммо баъзи тоифалар суннатлар сафарда тарк қилинади, суннатларни сафарда тарк қилиш суннат, деган маънода ихтилоф қилганлар.

Кўпгина мусулмонларнинг қизлари ва аёлларининг иш ёки ўқиш шароитлари бошқа вилоятларга сафар қилишга мажбур қилади. Сафарларининг масофаси намозни қаср қилиш масофасидан узоқ. Маҳрамсиз учқичда ёки бошқа сафар воситаларида сафар қилинади. Улар танийдиган ёки уларни танийдиган аёллар ҳам йўқ. Одатда учқич ёки бошқа нақлёт воситасида ким мусофир бўлиб кетаётган бўлса, ўшалар билан кетилади. Бундай сафарнинг ҳукми нима?