364-боб. Ейиш, ичиш, таҳорат қилиш ва бошқа ишларда тилла ва кумуш идишларни ишлатишнинг ҳаромлиги ҳақида
- Душанба, Окт 24 2022
- 15184 марта кўрилди
1794/1. Умму Саламадан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Кумуш идишларда сув ичадиганлар қорнини дўзах оловига тўлдирибди», дедилар. Имом Бухорий ва Муслим ривоятлари.
Имом Муслимнинг ривоятларида «Тилла ва кумуш идишларда сув ичувчи ва овқатланувчилар» бўлиб келган.
1795/2. Ҳузайфадан розияллоҳу анҳу ривоят қилинади. Расулуллоҳ соллоллоҳу алайҳи васаллам ипак ва кимхоб кийишдан ҳамда тилла, кумуш идишларда сув ичишдан ман қилдилар. Ва: «Бу нарсалар бу дунёда кофирлар учун, охиратда эса сизлар учундир», дедилар. Имом Бухорий ва Муслим ривоятлари.
Икки «Саҳиҳ» китобида келган Ҳузайфа розияллоҳу анҳу ривоятларида Расулуллоҳ соллоллоҳу алайҳи васаллам: «Ипак ва кимхобдан тайёрланган кийимлар кийманглар, тилла, кумуш идишларда сув ичманглар ва тилла, кумуш тақсимчаларда овқат еманглар», деб айтдилар.
1796/3. Анас ибн Сийриндан ривоят қилинади: «Анас ибн Молик розияллоҳу анҳу билан бирга бир неча мажусийлар ҳузурида ўтирганимизда, кумушдан ясалган идишда қиём олиб келинди. У зот бундан емадилар. Олиб келган кишига бу идишингни алмаштириб кел, деб айтилган эди, у киши кумуш идишни халанж дарахтидан ишланган косага алиштириб келди. Анас ибн Молик бу идишдаги қиёмдан тановул қилдилар». Имом Байҳаққий ҳасан иснод билан ривоят қилганлар.