345-боб. Жума кунининг кундузини рўзага ва кечасини намозга хослаб олишнинг кароҳияти тўғрисида
- Душанба, Окт 24 2022
- 12263 марта кўрилди
1759/1. Абу Ҳурайрадан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Кечалардан жума кечасини таҳажжуд намозига, кундузлардан жума кунини рўзага хослаб олманглар. Лекин одатдаги рўзага тўғри келиб қолса, зарари йўқ», дедилар. Имом Муслим ривояти.
1760/2. Абу Ҳурайрадан ривоят қилинади. Расулуллоҳ соллоллоҳу алайҳи васаллам: «Ҳеч бир киши жума кунининг ёлғиз ўзида рўза тутмасин. Лекин жумага пайшанбани ёки шанбани қўшиб тутса, зарари йўқ», дедилар. Имом Бухорий ва Муслим ривоятлари.
1761/3. Муҳаммад ибн Аббоддан розияллоҳу анҳу ривоят қилинади: «Жобирдан розияллоҳу анҳу «Расулуллоҳ соллоллоҳу алайҳи васаллам жума кунининг ўзида рўза тутишдан ман қилганларми?» деб сўрасам, у зот: «Ҳа», деб жавоб қилдилар». Имом Бухорий ва Муслим ривоятлари.
1762/4. Уммул мўминин Жувайрия бинти Ҳорисдан розияллоҳу анҳу ривоят қилинади. Расулуллоҳ соллоллоҳу алайҳи васаллам жума куни бу онамиз ҳузурларига кирсалар, рўзадор эканлар. Расулуллоҳ соллоллоҳу алайҳи васаллам у кишидан: «Кеча рўза тутган эдингми?» деб сўрадилар. Жувайрия розияллоҳу анҳу: «Йўқ», деб жавоб бердилар. Расулуллоҳ соллоллоҳу алайҳи васаллам: «Эртага рўза тутишни хоҳлайсанми?» дедилар. Жувайрия розияллоҳу анҳу: «Йўқ», дедилар. Шунда Расулуллоҳ соллоллоҳу алайҳи васаллам: «Ундай бўлса, очиб юбор, яъни рўза тутмагин», дедилар. Имом Бухорий ривояти.