201-БОБ. Шом намозининг фарзидан олдин ҳам, кейин ҳам ўқиладиган суннат намози ҳақида
- Якшанба, Окт 23 2022
- 14640 марта кўрилди
Бу бобимизга Ибн Умар розияллоҳу анҳу ва Оишалардан розияллоҳу анҳулардан: «Албатта, Расулуллоҳ соллоллоҳу алайҳи васаллам шом намозидан кейин икки ракат суннат намозини ўқир эдилар», деб ривоят қилинган, Мана шу саҳиҳ ҳадис ҳам далилдир.
1121/1. Абдуллоҳ ибн Муғаффалдан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Шомдан олдин икки ракат намози ўқинглар», деб икки марта айтиб, учинчисида: «Хоҳлаган киши ўқисин», дедилар. Имом Бухорий ривоятлари.
1122/2. Анасдан розияллоҳу анҳу ривоят қилинади. Расулуллоҳнинг соллоллоҳу алайҳи васаллам кибор саҳобалари шом пайтида масжид устунлари орқасида намоз ўқиш учун шошаётганларини кўрдим. Имом Бухорий ривоятлари.
1123/3. Анасдан розияллоҳу анҳу ривоят қилинади. Бу зот: «Бизлар Расулуллоҳ соллоллоҳу алайҳи васаллам замонларида қуёш ботгандан кейин шом намозидан олдин икки ракат ўқир эдик», деганларида, «Расулуллоҳ соллоллоҳу алайҳи васаллам ҳам буни ўқирмидилар?» деб сўрашди. Шунда Анас розияллоҳу анҳу: «Расулуллоҳ соллоллоҳу алайҳи васаллам бизнинг ўқиганимизни кўрардилар-да, лекин ўқишни буюрмас ва қайтармас эдилар» дедилар. Имом Муслим ривоятлари.
1124/4. Анасдан розияллоҳу анҳу ривоят қилинади. Бизлар Мадинада эканимизда агар муаззин шом намозига азон айтса, одамлар устун нарёғида намоз ўқишга шошар ва у ерда икки ракат намоз ўқир эди. Агар мусофир киши масжидга кирадиган бўлса, бу икки ракатни ўқувчилар кўплигидан шом намозининг фарзи ўқиб бўлинибди, деб гумон қилар эди. Имом Муслим ривоятлари.
(Бизнинг Ҳанафия мазҳабида шомнинг фарзидан олдин икки ракат суннат ўқилмайди. Балки фарзидан кейин икки ракат суннат ўқилади. Ҳанафия мазҳабидагилар ҳам бу сўзларига саҳиҳ ҳадислардан далил қилиб келтиришган. – Тарж)