Ғазо сектори Соғлиқни сақлаш вазирлиги маълумотларига кўра, 2023 йил октябридан буён Исроилнинг ҳарбий кампанияси натижасида камида 54 880 нафар фаластинлик ҳалок бўлган, дея хабар берди Anadolu агентлиги якшанба куни.
Вазирлик баёнотида айтилишича, сўнгги бир сутка давомида шифохоналарга яна 108 нафар ҳалок бўлганларнинг жасадлари, шунингдек 393 нафар яраланганлар олиб келинган. Ҳарбий ҳаракатлар бошланганидан буён жабрланганларнинг умумий сони 126 227 нафарга етган.
"Кўплаб жасадлар ҳали ҳам вайроналар остида ва кўчаларда қолиб кетган, чунки қутқарув хизматлари уларга етиб бора олмаяпти", — дейилади хабарда.
Исроил армияси 18 март куни Ғазога қарши оммавий зарбаларни қайта бошлади, бу билан аввалроқ эришилган ўт очишни тўхтатиш ва асирлар алмашинуви бўйича келишувларни бузди. Шу вақтдан бошлаб, вазирлик маълумотларига кўра, 4 603 нафар фаластинлик ўлдирилган, яна 14 186 киши жароҳат олган.
Халқаро ҳамжамият хавотир билдиришда давом этмоқда. Ўтган йилнинг ноябрь ойида Халқаро Жиноий Суд (ХЖС) Исроил Бош вазири Биньямин Нетаняҳу ва собиқ Мудофаа вазири Йоав Галантни Ғазодаги ҳарбий жиноятлар ва инсониятга қарши жиноятларда айблаб, ҳибсга олишга ордер берган эди.
Бундан ташқари, БМТ Халқаро Суди Исроилга қарши анклавдаги ҳаракатлари сабабли қўзғатилган геноцид ишини кўриб чиқмоқда.
Исроилнинг ҳарбий зарбалари мусулмонлар учун муқаддас Қурбон ҳайити (Ид ал-Адҳа) кунларида ҳам давом этди, бу эса Ислом оламида ва халқаро инсон ҳуқуқлари ташкилотлари орасида қўшимча ғазабга сабаб бўлмоқда.

Абу Муслим