Путиннинг "кичик дўсти" Башар Асад режими жиддий муаммоларга дуч келмоқда: унга қарши ҳатто аввал золимга содиқ бўлганлар, жумладан ҳарбийлар ҳам чиқишмоқда.

Сурия Араб армиясининг 5-ихтиёрий штурмовчи корпуси, яқин вақтгача диктатор Башар Асад режимига хизмат қилган, оппозиция кучлари томонига ўтгани ҳақида маълум қилинди. Эътиборли жиҳати шундаки, Сурия ҳукумат кучларининг ушбу йирик бўлинмаси Россия Федерацияси томонидан шакллантирилган ва қуроллантирилган эди, деб хабар беради Anadolu агентлиги.

Маълум қилинишича, Дераъа (Суриянинг жануби-ғарбида жойлашган) шаҳрида хизмат қилган ва аввал Москвадан пул ва қурол олган ушбу корпус тўсатдан Сурия оппозициясининг Жанубий операциялар штабини ташкил қилганини эълон қилди.
Сурия Араб армиясининг энди "собиқ" 5-корпуси вакиллари туркларга тегишли прокси-қўшинлар ва "Ҳайъат Таҳрир аш-Шом" (ХТШ) исломий гуруҳи билан бирлашиш ниятида эканини ва пойтахт Дамашққа юриш қилиш режасини билдиришди. Улар ўз баёнотида диктатор Башар Асад армиясининг бошқа аскарларини ҳам ўз томонларига ўтишга чақирган.
Қизиқарлиси, 2017 йилгача ушбу корпусга россиялик генерал Валерий Асапов қўмондонлик қилган. Энди эса бу бўлинма Россиянинг иттифоқчиси – Асад режимига қарши курашади.
Шунингдек, ХТШга тегишли қўзғолончи кучлар Хомс шаҳрига яқинлашгани ва 40 км масофани бир кунда босиб ўтгани ҳақида хабар берилмоқда. Агар Хомс йўқотилса, бу Россия Қуролли Кучларининг Ўрта Ер денгизидаги ҳарбий базаларини Дамашқдан ажратиб қўяди ва Путин армиясини Хмеймим авиабазасидан чекиниш ёки бошқа оғир қарор қабул қилишга мажбур қилади.
Шунингдек, Bloomberg агентлиги Кремлдаги номаълум манбага таянган ҳолда, Москвада Асад режимига ёрдам бериш учун аниқ режа йўқлигини хабар қилди.

Абу Муслим