Суриянинг Идлиб вилоятига янги гуманитар фалокат яқинлашмоқда. Россия ва Асад режими томонидан касалхоналарга қарши тизимли компания олиб борилгандан сўнг, жанубдаги Идлиб вилоятида тиббий муассасалар қолмади. Маҳаллий манбаларга кўра, Асад режими бу минтақадаги сўнгги касалхонани бомбардимон қилган ва вайронага айлантирган. Чоршанба куни кечаси Кафранбелдаги болалар касалхонаси ва Равда туғруқхонаси вайрон қилинган.

Идлиб ҳудудида вазиятнинг кескинлашуви оқибатида тўрт ой давом этган жанговар ҳаракатлар натижасида 1089 нафар тинч аҳоли вакиллари ҳалок бўлди, деб маълум қилди БМТ инсон ҳуқуқлари бўйича Олий комиссари Мишель Бачелет Женевада бўлиб ўтган матбуот анжуманида.

"Россия ва Туркия Суриянинг Идлиб шаҳридаги одамларга хавфсизлик ваъда қилди. Бироқ минглаб ҳалок бўлганлар ва юз минглаб қочоқлар шундан далолат берадики: Эрдўған Путиннинг беандишалигига қарши қўядиган ҳеч нарсаси йўқ", - деб ёзади немис журнали Der Spiegel.

"Сурия режими Идлибни эгаллаб олмоқчи – лекин ҳозирча уринишлар муваффақиятсиз якун топмоқда. Туркия томонидан қўллаб-қувватланадиган исёнчилар Асад томонида рус махсус бўлинмалари ҳам жанг қилаётганини айтмоқда", - хабар қилади Германиянинг Der Spiegel журнали.

Бундан икки ой олдин бошланган асадчилар-россия кучлари Суриянинг шимолий-ғарбий қисмидаги ҳужумлари натижасида ҳалок бўлганлар сони камида 544 нафар тинч аҳолини ташкил қилади. Бу ҳақида Reuters инсон ҳуқуқлари бўйича Сурия тармоғига ҳавола қилган ҳолда хабар қилади.