Эр-хотиннинг ажралишдан бошқа чораси қолмаганида орани бир йўла узмаслик лозим. Бунинг учун эр суннатга мувофиқ талоқ қилиши керак. Суннатга мувофиқ талоқ ҳасан ва аҳсан турларга бўлинади. Киши ўзи билан жинсий алоқада бўлган хотинига уч талоқни бўлиб: ҳар ҳайздан тоза бўлганида қўшилмасдан бир ражъий талоқ бериши ҳасан талоқдир. Бунда эр-хотинликни давом эттириш имкони учинчи талоқни бергунга қадар сақланиб қолади. Ҳанафий уламолар ҳасан талоқ таърифига Расулуллоҳ соллаллоҳу алайҳи васалламнинг Абдуллоҳ ибн Умарга: «Аёлингнинг ҳолатини кутиб, ҳар поклик чоғида биттадан талоқ қилмоғинг суннатдандир», деган ҳадисларини далил қилишган.