1228/1. Анасдан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Саҳарлик қилинглар. Чунки саҳарлик қилишда барака бордир», дедилар. Имом Бухорий ва Муслим ривоятлари.
1229/2. Зайд ибн Собитдан розияллоҳу анҳу ривоят қилинади. Бу зот: «Биз Расулуллоҳ соллоллоҳу алайҳи васаллам билан бирга саҳарлик қилдик. Кейин намозга турдик», деганларида, ёнларидагилар томонидан: «Унинг орасидаги муддат қанча эди?» деб савол берилди. Шунда Зайд розияллоҳу анҳу: «Эллик оят ўқиш миқдорича фурсат эди», дедилар. Имом Бухорий ва Муслим ривоятлари.
1230/3. Ибн Умардан розияллоҳу анҳу ривоят қилинади. Расулуллоҳнинг соллоллоҳу алайҳи васаллам икки муаззинлари бор эди. Бири Билол розияллоҳу анҳу, иккинчиси Ибн Умму Мактум розияллоҳу анҳу. Икковлари ҳақида Расулуллоҳ соллоллоҳу алайҳи васаллам: «Билол (тонг отмасидан олдин) кечаси азон айтади. Сизлар у азон айтганида то Ибн Умму Мактум айтгунича бемалол еб-ичаверинглар», дедилар. Ибн Умар розияллоҳу анҳу: «Бу икки азон ўртасида бирлари чиқиб, иккинчилари тушгунчалик фурсат ўтар эди», дедилар. Имом Муслим ва Бухорий ривоятлари.
1231/4. Амр ибн Оссдан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Биз билан аҳли китоблар (яҳудий ва насронийлар) нинг рўзаси орасидаги фарқ саҳарлик қилишдадир», дедилар. Имом Муслим ривоятлари.
Фойда: Ислом умматининг бошқалардан устун бўлган хусусиятларидан бири ифторлик қилишдир.