Аллоҳ таоло: «Мўмин ва мўминаларга бирон гуноҳ қилмасликларидан озор берадиган кимсалар ҳам бўҳтон ва очиқ гуноҳни ўз устларига олибдилар» (Аҳзоб сураси, 58-оят);
«Бас, энди сиз ҳам етимга қаҳр қилманг. Сўровчи гадони эса (бирон нарса бермасдан) ҳайдаманг» (Зуҳо сураси, 9–10-оятлар), деб айтган.
Бу бобга тааллуқли ҳадислар кўп бўлиб, олдинги бобда келган Абу Ҳурайрадан қилинган 386 ҳамда 33-бобдаги 261–262-ҳадислар ҳам шу бобга тегишлидир.
389/1. Жундуб ибн Абдуллоҳдан розияллоҳу анҳу ривоят қилинади. Расулуллоҳ соллоллоҳу алайҳи васаллам: «Ким бомдод намозини ўқиса, у Аллоҳнинг ҳимоясидадир. Бас, (эй инсонлар), Аллоҳ сизларни ўша ҳимояга тажовуз қилган ҳолда топмасин. Кимни энди тажовуз қилган ҳолда топса, уни юзи билан жаҳаннам ўтига ташлайди», дедилар. Имом Муслим ривоятлари.